فاصل لنواصل +انكار المنكر بالمنكر+ عدنا

السلام عليكم ورحمه الله وبركاته

أزيكم يا جماعة عاملين ايه

والله الواحد وحشته الكتابه بقاله 18 يوم بالظبط مش كتب اي حاجه سواء هنا او في أي موقع تاني

هوه صحيح الواحد مش بيكتب حكم أوخبرات عجوز في ال60 بس شئ كويس ان الواحد ان لو واحد وقع في غلط مثلا

يقوله للناس بطريقه او باخرى في سبيل ان محدش يقع فيه

طبعااااااااااا علشان اكون واضح جداااااااا محدش يقول هوه عمل ايه او يقعد يستعرض الخطأ الي وقع فيه

الاقي تاني يوم واحد عامل بلوج ويكتب انا ندمان اوي يا جماعة على الي عملته امبارح وياريت محدش يقع فيه

انا عاكست واحده امبارح وقلتلها "ياحلو انت يا حلو" ولما مش ادتني وش قلتلها

يابت انا رايدك على طريقة الافلام المصرية القديمة الاسود في الاسود

وعلى فكره موضوع ان الواحد يقول اخطائه ده مهم جداااااااااااااا وشاغل بالي من زمان اوي

فاكر كويس جدا من سنتين او 3

والخبر ده منشور في جريدة اخبار اليوم في العدد بتاع يوم السبت في القسم بتاع اخبار عالمية

واصلا من أهمية الخبر قطعت الخبر ده ومحتفظ بيه

الخبر بقى بيقول ايه

ان فيه قناة هندية فتحت جديد ووسجلت مشاهد لسياسين ورجل دين هندوسي ونجم سينمائي في مواضع مش مظبوطة يعني

وقال الخبر ان قوبل بغضب عارم موجه للقناة

وماقدمت به تلك المحطة ليس الا استغلال للعبة القديمة فبدعوى فضح المنحرفين اخلاقيا نقوم نحن بنشر مثل هذه المواد الاباحية ونستفيد من ذلك

هوه ده المهم في خبر كله والسبب اني كنت مهتم بالموضوع ده

اني كنت عمال ادور يمين وشمال على حاجه تدين جرانين الغبية الي عندنا دي

يعني انا عارف ومتأكد انها غلط مليون في المية بس كنت بقول هل هما نيتهم كويسه يعني بيفضحوا الناس دي مثلا وبس؟

ربنا يهديهم بقى

لاني اعتقد ان وسائل التعبير عننا مصابة بمرض بجد

الجرائد تعبانه صراحه الواحد مش لاقي حاجه يقراها يقول انا ده الحجات كلها غريبة وقديمة وكمان منقولة بالكربون

يعني جرنان اول ميفتح يخصص صفحتين للشباب (وباقي الجرنان للمراهقين تحت 9 سنين) ويكون محتوى الصفحيتن اخطر القضايا

زي الجواز العرفي يعني ببساطه علشان تهتم بالجرنان لازم تكون مجرم وسافل

وساعتها هتلاقي الجرنان بيقول كلام جميل اوي

وبالصدفة عرفت رائي الدين في الموضوع ده

ساعة الاسائة بتاعت رسوم الكاريكاتير ناس بنت حلال نشرت الصور لينا على الايميلات !!!!!!!!! بجد مش عارف باي منطق

يعني الناس قالت ان فيه صور مجسدين فيها الرسول صلى الله عليه وسلم يبقى مش مقبول تمااااااااما انك تشوفها حتى لو مش كانت بتسئ ليه

المهم واحد محترم دور على الموضوع وجاب فتوى بحرمانية نشر الحجات دي وذنبها بيوصل للكفر وكان الراجل منطقة جميل جدا وسهل

وهوه أنه لا يجوز انكار المنكر بالمنكر يعني ايه؟

يعني انت لو شفت واحد واحد في وضع مخل مثلا

مش تقوم تصوره وتفضحه في كل مكان

لا انت كده شفت منكر ومش عجبك فحبيت تنكر المنكر فعملت منك (مش عارف ليه جيه في بالي دلوقتي طبق طبقنا يضرب طبق طبقكم)والحمدلله الرد ده ريحني جدا

يلا خير

أما سبب الغياب الطويل ده بجانب مشاغل الحياة والواحد بيدور على شغل

شفت موضوع في مدونة تانية , صحبة المدونة قالت انها هتبطل تكتب تاني

والسبب انها قرت في مدونة تانية خالص ان الواحد لازم يكتب حاجه مفيدة ده غير ان المدونات كترت اوي

فكل مفكر اكتب حاجه اقعد اقول دي مفيده ولا لا وهل لو الموضوع ده مفيد الي بعديه هيكون مفيد ؟

قررت في الاخر اخليها على الله

وشكراااااااا لكل الناس الي وقفت جنبي وشجعتني ومازالت بتشجعني على العكعكة الي بعملها والي ليها اسم تاني فرعي أسمه التصميم

فنظريا تصميم وعمليا عكعكة

والحمدلله النهارده 14-1 يبقى عدى شهرين بالظبط على اول كليك في الفوتشوب

وعقبال منصمملكم فرحكم